चांदणं टिपूर हलतो वारा
चांदणं टिपूर, हलतो वारा की डुलतो वारा
टाकते पलंग पुढल्या दारा की मागल्या दारा
त्यावर बसा की हवालदारा की शिलेदारा !
डावी पापणी फुरफुर करी
नवसाला अंबाबाई पावली खरी
अवचित सजणा आला घरी
मनच्या खुशीत की मजला कुशीत घ्या दिलदारा !
पंचकल्याणी घोड्यावरून
दौडत आलो सये दुरुन
रूप घेऊ दे डोळा भरून
तुजला बघून ग जाईल निघून हा थकवा सारा !
शालूच्या पदरानं पुसते हो पाय
खायाला देते मी साखरसाय
आणखीन सेवा करू मी काय?
पडते गळा की लावते लळा की द्या आधारा !
नेसुन चांदणं आलीस अशी
पुनव चांदणी झुकली जशी
डाव्या हाताची घे ग उशी
चांदणं मिठीत की चांदणं दिठीत झिमझिम धारा !