पहा पहा मंजुळा हा
Paha Paha Manjula Ha
हरेंद्र जाधव
लयास गेली युगायुगांची हीन दीन अवकळा
पहा पहा मंजुळा हा माझ्या भीमरायाचा मळा
रानमाळ असता भीमाने देह इथे झिजविला
शिंपडून रक्ताचं पाणी शिवार हा भिजविला
बहरली कणसं इमानी माणसं नाचतो जोंधळा
पहा पहा मंजुळा हा माझ्या भीमरायाचा मळा
त्रिसरणाची झडप तयाला कुंपण पंचशीला
बुद्धं सरणं मार्ग एक हा जाण्यासाठी भला
मिटते भ्रांती मिळते शांती खुलवी जीवनकळा
पहा पहा मंजुळा हा माझ्या भीमरायाचा मळा
बोधिवृक्ष हे डुलती कैसे बांधाबांधावरी
गोड लागते सावलीत या जीवनाची भाकरी
मळा हा राखू फळे ही चाखू, झरा बाजूला निळा
पहा पहा मंजुळा हा माझ्या भीमरायाचा मळा
कोल्हेकुई ही कुपाकुपानं चाले बाहेरून
दुहीचा कुंदा वरती डोके काढितो आतून
हरेन्द्रासंगं धरूया दोघं हाती एकीचा विळा
पहा पहा मंजुळा हा माझ्या भीमरायाचा मळा